Rama i pret shpresat Lulzim Bashës, për t’u zgjedhur president

Kryeministri Edi Rama, pas përfundimit të Asamblesë Kombëtare të Partisë Socialiste, tha për mediat se problemi më i madh i partisë që drejton është vetvetja, pasi kundërshtarët janë aktualisht “një problem që nuk ekziston”.

Në lidhje me zgjedhjen e presidentit, Rama tha: “Partia Socialiste i ka votat për ta zgjedhur e vetme kreun e shtetit, kështu që përgjegjësia është e jashtëzakonshme. Kemi përgjegjësi që Presidenti të jetë njeri normal”.

Kur u pyet nëse Lulzim Basha mund të jetë presidenti i ardhshëm, Rama u përgjigj: “Basha mund të bëhet president me votat e kësaj shumice aq sa Sali Berisha mund të fitojë çmimin Oscar”.

Kujtojmë që prej javësh përflitet se Lulzim Basha do të kandidohet për president.

Këto zëra u përforcuan nga Sali Berisha, i cili tha se kjo tregon se Basha bashkëpunon me Ramën.