Ngacmim seksual ndaj ambasadores së Luksemburgut në Kosovë, arrestohet një person

Policia e Prishtinës ka arrestuar një person për ngacmim seksual të Ambasadores së Luksemburgut në Kosovë.

Sipas informacioneve, shtetasi E.H. ka ngacmuar me fjalë të pahijshme përfaqësuesen e shtetit luksemburgas në Kosovë në rrugë ditën e djeshme.

Pas denoncimit, E.H. është ndaluar nga policia e kryeqytetit të Kosovës dhe do të qëndrojë në paraburgim për 48 orë deri në ballafaqimin në seancën e parë.

Njoftimi i Policisë:

Prokuroria Themelore në Prishtinë, Departamenti i Përgjithshëm, me aktvendim të prokurorit të shtetit ka ndaluar në kohëzgjatje prej 48 orësh personin me inicialet E.H., pasi i njëjti dyshohet se ka kryer veprën penale “Ngacmimi”, nga neni 182 të Kodit Penal të Republikës së Kosovës. I dyshuari i lartcekur, më 10.11.2021, gjatë qarkullimit në trafikun rrugor në Prishtinë, ka shfaqur sjellje të padëshirueshme të ngacmimit ndaj Ambasadores së Luksemburgut në Kosovë. Ndaj të njëjtit, do të ndërmerren veprime të mëtejme procedurial.