Europa drejt valës së 4 të Covid. ‘Omicron’ izolon Holandën. Nuk ka festa në Francë, frikë në Britani
Nga 26 nëntori e deri më sot, janë prekur 89 vende. Me paralajmërimin e OBSH-së varianti “Omicron” po përhapet më shpejt se “Delta”, me një kohë dyfishimi prej 1.5 deri në 3 ditë.
Është veçanërisht shqetësuese që “Omicron” po përhapet me shpejtësi në vendet me nivele të larta të imunitetit të popullsisë, por OBSH shpjegon se nuk është e qartë nëse kjo është për shkak të aftësisë së virusit për t’iu shmangur vaksinës, transmetueshmërisë së tij më të lartë apo një kombinimi të të dyjave.
Megjithatë, varianti i ri po tremb Evropën, teksa përpiqet të luftojë valën e katërt të Covid me rregulla, masa dhe kufizime.
Ky është rasti i Holandës, e cila ka nisur një bllokim të ri: ka filluar të të dielën në orën 05:00 dhe do të përfundojë në 14 janar. Në Mbretërinë e Bashkuar ka një rekord absolut të infeksioneve nga Covid (93,045 në 24 orët e fundit) dhe priten dy javë mbyllje totale. Ndërkohë Gjermania e ka vendosur Britaninë e Madhe në listën e vendeve me rrezik të lartë.
Bllokimi në Holandë – Të dhënat tregojnë se në Amsterdam numri i rasteve të “Omicron” nga numri i përgjithshëm i infeksioneve dyfishohet çdo dy ose tre ditë. Ekipi kombëtar i menaxhimit anti-Covid, i ka rekomanduar qeverisë “masa të ashpra” për të frenuar përhapjen e variantit “Omicron” dhe qeveria qendrore ka vendosur të marrë masën më të ashpër: bllokim deri më 14 janar.
Kufizime të reja në Danimarkë – Parlamenti ka miratuar masat e shpallura nga kryeministrja Mette Frederiksen që përfshijnë mbylljen e teatrove, kinemave, sallave të koncerteve, parqeve argëtuese, muzeve dhe galerive të artit në të gjithë vendin për të përmirësuar përhapjen e koronavirusit.
Dyqanet më të vogla se 2000 metra katrorë dhe restorantet, do të duhet të kufizojnë numrin e klientëve dhe do të duhet të shërbejnë ushqimet e fundit dhe pijet alkoolike deri në orën 22:00 para se të mbyllen në 23:00.
Qeveria daneze këshillon qytetarët që të kufizojnë kontaktet sociale gjatë pushimeve dimërore dhe u bëri thirrje kompanive publike dhe private që punonjësit të punojnë nga shtëpia kudo që të jetë e mundur.
Rregullat e udhëtimit në Austri – Nga 20 dhjetori, vetëm ata që kanë marrë tashmë dozën e tretë të vaksinës do të mund të hyjnë në Austri pa kufizime. Personat që janë vaksinuar (por nuk kanë marrë ende dozën e tretë) ose të kuruar, do të duhet të kenë një PCR negative jo më të vjetër se 72 orë. Për të paimunizuarit, vendoset një karantinë dhjetëditore. Izolimi mund të ndërpritet pas pesë ditësh me PCR negative. Këtë e ka bërë të ditur ministri i Shëndetësisë, Ëolfgang Mueckstein. Masa nuk vlen për fëmijët deri në 12 vjeç, gratë shtatzëna dhe personat që nuk mund të vaksinohen për arsye shëndetësore. Për udhëtarët ndërkufitarë, leja “3-G” (i kuruar, vaksinuar ose e testuar) është e mjaftueshme.
Nuk ka festa të Vitit të Ri në Francë – Kryebashkiaku i Parisit ka njoftuar anulimin e hedhjes së fishekzjarreve dhe koncertet e planifikuara në Champs-Elysees për natën e Vitit të Ri, me qëllim zbatimin e masave të kërkuara nga qeveria për të luftuar epideminë Covid -19.
Komuna informoi agjencinë e lajmeve AFP me një shënim: “Për shkak të rifillimit të pandemisë dhe njoftimeve të reja të qeverisë, qytetit të Parisit i vjen keq që duhet të anulojë të gjitha festimet e planifikuara në Champs-Elysees më 31 dhjetor, ku nuk do të ketë fishekzjarre dhe aktivitete këtë vit”.
Qeveria po punon për një projektligj që do të paraqitet në Kuvend në fillim të janarit, i cili do të shërbejë për shndërrimin e kalimit aktual shëndetësor në një certifikatë vaksinimi.
Hipotezat në Mbretërinë e Bashkuar – Në Britani, autoritetet po punojnë për një plan për një bllokim hipotetik prej dy javësh pas Krishtlindjeve, i cili do të përfshinte ndalimin e takimeve në ambiente të mbyllura, përveç se për arsye biznesi dhe kufizimin e shërbimit për pijet dhe restorantet vetëm jashtë. Lajmi është raportuar nga gazeta “The Times”, duke shpjeguar se masat do të synojnë të ngadalësojnë përhapjen e variantit “Omicron” të koronavirusit. Sipas gazetës, megjithatë, kryeministri Boris Johnson nuk e ka miratuar ende planin dhe nuk ka ndërmend të “mbyllet”.
Gjermania fut Britaninë në listën e vendeve me rrezik të lartë – Gjermania ka përfshirë Britaninë e Madhe në listën e vendeve me rrezik të lartë për përhapjen e Covid-it, sipas asaj që kanë njoftuar autoritetet shëndetësore në Berlin.
Vendimi përfshin një sërë kufizimesh udhëtimi, të cilat do të hyjnë në fuqi mesnatën e së dielës. Ndër këto, Instituti ‘Robert Koch’ saktëson detyrimin e një karantine dy-javore për ata që vijnë nga Mbretëria e Bashkuar në Gjermani, edhe nëse janë të vaksinuar.
“Shtrydhja” e Zvicrës – Vendi ka njoftuar një shtrëngim të kufizimeve, duke kufizuar aksesin në vendet publike për njerëzit e pavaksinuar dhe duke detyruar kthimin në punën inteligjente. Vetëm personat që janë vaksinuar ose kuruar, do të kenë akses në restorante, hapësira kulturore dhe ambiente sportive dhe rekreative. Përveç kësaj, edhe tubimet private gjatë sezonit të festave do të duhet të kufizohen në dhjetë persona, duke përfshirë fëmijët, pavarësisht se ndonjë nga të pranishmit e moshës 16 vjeç e lart nuk është as i vaksinuar dhe as i shëruar.
Vaksinat e Turqisë – Presidenti Rexhep Tajip Erdogan njoftoi në një samit të liderëve të kontinentit, se Turqia do të dërgojë 15 milionë doza të vaksinës në Afrikë. Ndërkohë, vendi po zhvillon vaksinën e vet, të njohur si “Turkovac”, e cila do të marrë miratimin për përdorim urgjent. Pas autorizimit të saj, vaksina do të ndahet me Afrikën. Është e paqartë nëse Turqia do të dërgojë gjithashtu doza të vaksinave të miratuara ndërkombëtarisht që po përdor aktualisht në continent.
