10 Qershor, 2023

Edhe Putin shprehu keqardhje për vdekjen e 50 shqiptarëve, vetëm Rama s’do t’ia dijë

 Edhe Putin shprehu keqardhje për vdekjen e 50 shqiptarëve, vetëm Rama s’do t’ia dijë

Nga Enver Robelli

Edhe Vladimir Putini shprehu keqardhje për gati 50 shqiptarë të vdekur në aksidentin e tmerrshëm afër Sofjes në Bullgari.

Ditë zie shpallën Maqedonia e Veriut, Kosova dhe Bullgaria.

Shqipëria nuk e pa të nevojshme një gjest të tillë, pra të shpallë ditë zie.

Ka diçka të kalbur në elitat politike në Tiranë. Dhe ky është, në radhë të parë, problem i qytetareve dhe qytetarëve të Shqipërisë që zgjedhin figura jodinjitoze në pushtet.

Krahasojeni mungesën e gjestit për viktimat shqiptare nga Maqedonia e Veriut me propagandën qeveritare të Tiranës kur Serbia i dërgoi nja 10 zjarrfikës për të ndihmuar Shqipërinë pas tërmetit. (Kosova dërgoi forca ushtarake, me atë rast).

Dje u bë shumë propagandë se tani me një aplikim të thjeshtë qytetarët e Shqipërisë dhe Kosovës mund të pajisen me leje qëndrimi dhe leje të punës në vendet përkatëse.

Por gjysma tjetër e së vërtetës është se në kuadër të projektit “Ballkani i Hapur” qytetarëve të Serbisë u lejohet e drejta e punës dhe qëndrimit në Shqipëri pa gati asnjë procedurë burokratike.

Nga Smedereva në Sarandë – pa asnjë pengesë. Nga Dimitrovgradi në Durrës – po ashtu pa problem.

Nga Kikinda në Korçë – nema problema! Nga Beogradi në Berat – pse jo!?

Në rrethana normale, pra nëse Serbia do të pranonte Kosovën si shtet, kjo nuk do të ishte edhe aq problem, por në situatën aktuale ky favorizim aq i madh i Serbisë nga Tirana është neveritës.

Rrjedhimisht, në sezonet e ardhshme turistike në bregdetin shqiptar do të kumbojë edhe më shumë muzika e Cecës dhe Dragana Mirkoviqit dhe do të ketë gjithnjë e më shumë lokale që ofrojnë “Leskovačka mućkalica”.

Leave a Reply

Adresa juaj email s’do të bëhet publike. Fushat e domosdoshme janë shënuar me një *